Pwy yr ydym yn eu helpu

Mae Mrs Morris (81 oed) yn wraig weddw ac yn berchen ei chartref ei hun. Mae ganddi nifer o gyflyrau iechyd yn cynnwys pwysedd gwaed a colesterol uchel ac arthritis a threuliodd 3 wythnos yn yr ysbyty yn ddiweddar yn dilyn ei strôc. Roedd yn annibynnol iawn cyn hynny er gwaethaf ei hiechyd. Mae ei dwy ferch a'u teuluoedd i gyd yn byw gryn bellter i ffwrdd.

Cysylltodd Mrs Morris gyda Gofal a Thrwsio gan ei bod yn bryderus am gyflwr ei tho. Roedd olion dŵr yn nwy o'r ystafelloedd gwely ac roedd hyn yn achosi gofid mawr iddi.

Fe wnaeth Swyddog Technegol Gofal a Thrwsio ymweld, canfod y broblem a chadarnhau fod gwaethygiad y to yn broblem fawr a bod angen to newydd. Ceisiwyd trwsio'r to nifer o weithiau yn y gorffennol ond nid oedd wedi datrys y problemau. Roedd y to wedi o asbestos rhychog a byddai angen contractwyr arbenigol ar gyfer unrhyw waith. Derbyniodd y swyddog technegol ddau ddyfynbris gan gontractwyr gyda chymwysterau addas ac roedd cost y gwaith yn £9,492 (yn cynnwys TAW).

Dim ond ei phensiwn gwladol oedd gan Mrs Morris i fyw arno ac nid oedd ganddi unrhyw arian wrth gefn i dalu am do newydd.

Bu Gweithiwr Achos Gofal a Thrwsio yn gweithio gyda Mrs Morris i ganfod a gwneud cais am gyllid dyngarol i dalu am y to newydd. Oherwydd bod ei diweddar ŵr wedi gwasanaethu yn y Royal Pioneer Corps derbyniwyd cyfanswm o £8,437 gan Gronfa Ddyngarol y Fyddin, y Royal Logistic Corps, Cronfa Argyfwng SSAFA a'r Lleng Brydeinig Frenhinol.

Fe wnaeth y Gweithiwr Achos hefyd gynnal gwiriad budd-daliadau i sicrhau fod Mrs Morris yn hawlio popeth oedd ar gael iddi. Nid oedd Mrs Morris yn hawlio lwfans Gweini felly gwnaed cais am hynny gan arwain at ddyfarnu'r gyfradd uwch (£87.65 yr wythnos). Fel canlyniad roedd Mrs Morris eisiau cyfrannu at gost y gwaith a rhoddodd £300.

Roedd yn rhaid i'r gweithiwr achos ganfod y £756 oedd ar ôl cyn y gallai'r gwaith ddechrau a gwnaeth gais llwyddiannus i Gronfa Cartrefi Iach i Bobl Hŷn Gofal a Thrwsio.

Mae'r gronfa hon, a drefnir gan Care & Repair Cymru, ar gael i gleientiaid Gofal a Thrwsio ledled Cymru sy'n cyrraedd y meini prawf. Roedd y £4,554 a gafwyd o ymgyrch Big Give 2018 yn gyfraniad sylweddol i'r gronfa.
Yn dilyn y gwaith yn gosod to newydd, mae Mrs Morris yn awr yn byw mewn cartref cynnes a diogel heb unrhyw ddŵr yn dod mewn drwy'r to. Mae ei hincwm wythnosol wedi cynyddu oherwydd iddi wneud cais am Lwfans Gweini ac mae ei lles cyffredinol wedi gwella gan nad yw'n pryderu am y to erbyn hyn.

Help i Symud - Stori Cleient

Roedd Mr Edwards yn byw ar ben ei hun yn ei dŷ 4 ystafell wely yng nghefn gwlad. Collodd ei wraig 4 blynedd ynghynt ac yntau'n 92 oed, roedd yn ei chael yn anodd ymdopi ar ei ben ei hun. Cafodd Mr Edwards ei atgyfeirio at 'Help i Symud' gan Delta Wellbeing (canolfan gyswllt Gwasanaethau Cymdeithasol). Roedd wedi bod yn ystyried symud ers peth amser ac wedi cysylltu flwyddyn ynghynt â Delta Wellbeing i ofyn am gyngor. Fodd bynnag, ni fedrent helpu. Flwyddyn yn ddiweddarach, pan gafodd Mr Edwards ei atgyfeirio at Delta gan feddyg teulu pryderus, cafodd ei fanylion eu trosglwyddo i gynllun newydd Help i Symud Gofal a Thrwsio Sir Gaerfyrddin.

Yn dilyn yr atgyfeiriad, ymwelodd Emma Harris-Jones (y Cydlynydd Help i Symud) â Mr Edwards. Gwelodd fod ei gartref mewn cyflwr gwael. Roedd Mr Edwards yn byw mewn un ystafell, heb fod lan y grisiau ers colli ei wraig ac yn ei chael yn anodd ymdopi yn y 'tŷ mawr'.

Cyn i Emma fod mewn cysylltiad ag ef, roedd Mr Edwards wedi rhoi ei gartref ar werth gyda gwerthwr tai lleol, wedi derbyn cynnig ac yn awr yn y broses o edrych am rywle mwy addas i fyw ynddo. Roedd yn ystyried prynu fflat yn agos at y dref ond heb ystyried tai gwarchod neu 'ofal ychwanegol'. Ar ôl clywed am y dewisiadau, penderfynodd Mr Edwards ymweld â safle gofal ychwanegol. Aeth Emma gyda Mr Edwards i weld y safle ac erbyn y trannoeth roedd wedi penderfynu y dymunai symud yno cyn gynted ag oedd modd.

Cysylltodd Emma gyda'i gyfreithiwr a gwerthwr tai a threfnu i Mr Edwards gael yr asesiadau perthnasol er mwyn sicrhau lle yn y safle gofal ychwanegol. Fe wnaethant drafod a chytuno pa gelfi roedd Mr Edwards eisiau eu cadw. Fe wnaethant drefnu dyfynbrisiau am symud a phenderfynodd Mr Edwards ddefnyddio cwmni symud lleol. Sicrhaodd Emma y cynhaliwyd gwiriadau i sicrhau fod Mr Edwards yn defnyddio cwmni dibynadwy.

Roedd Mr Edwards eisiau prynu eitemau ar gyfer ei fflat newydd, yn cynnwys oergell/rhewgell, dillad gwely a pheiriant glanhau. Gweithiodd Emma gyda chyfaill a chymydog dibynadwy i drefnu hyn.

Oherwydd bod Mr Edwards yn cael trafferth i symud o gwmpas, atgyfeiriodd Emma ef at Therapi Galwedigaethol a fedrodd drefnu sedd gawod, sedd uwch ar gyfer y toiled a chodwyr cadeiriau. Atgyfeiriwyd hefyd at y Gwasanaethau Cymdeithasol am asesiad gofal cymunedol. Fe wnaeth Emma hefyd gysylltu gydag asiantaethau trydydd sector lleol i gefnogi Mr Edwards, yn cynnwys FAST a helpodd i roi lluniau lan, rhoi celfi fflat-pac at ei gilydd a hyd yn oed drwsio cadair anwastad.

Ar ôl gorffen y symud, rhoddodd Emma gefnogaeth i Mr Edwards gysylltu â darparwyr cyfleustodau i newid ei gyfeiriad a threfnu taliadau Debyd Uniongyrchol. Fe wnaeth Emma hefyd ei gefnogi i hysbysu asiantaethau perthnasol megis yr Adran Gwaith a Phensiynau, banciau a chymdeithasau adeiladu am ei gyfeiriad newydd.
Yn ei adborth ysgrifennodd Mr Edwards, "Doeddwn i ddim yn gwybod digon am ddewisiadau tai a chostau". Roedd yn ddiolchgar iawn am y gefnogaeth a gafodd gan y cynllun Help i Symud, gan ddweud na fedrai fod wedi ymdopi hebddo. Wyth wythnos ar ôl ymweliad cyntaf Emma, mae Mr Edwards wedi setlo yn ei gartref newydd ac yn mwynhau cwmni staff a phreswylwyr eraill. Mae'n ymweld â'r bwyty bob amser cinio i gael pryd o fwyd cartref.

Mrs Brice 

Mrs Brice – Budd boeler newydd

Mae Mrs Brice (80 oed) wedi byw ar ben ei hun yn y tŷ am y 11 mlynedd ddiwethaf. Mae'n dioddef o nifer o afiechydon a gaiff eu gwaethygu gan oerfel.

Roedd y boeler gwres canolog yn ei chartref yn 30 oed ac yn torri lawr yn aml ac yn aneffeithiol. Nid oedd gan Mrs Brice unrhyw arian wrth gefn ac roedd yn methu talu am foeler newydd.

Gofynnwyd am amcanbrisiau ar gyfer boeler newydd ar ôl asesu anghenion Mrs Brice. Roedd cost lawn boeler newydd yn £3,180.

Oherwydd cefndir ac amgylchiadau Mrs Brice, gwnaeth Gofal a Thrwsio gais llwyddiannus am £1,375 o gyllid dyngarol:

EEEIBA £500.00
Supporting Friends £100.00
HomeWarmth £200.00
AFTAID £125.00
Cronfa Eaton £250.00
St John Lloyd £200.00
Cronfa Argyfwng Health Through Warmth £1,805

Trefnodd Gofal a Thrwsio i foeler newydd gael ei osod. Roedd Mrs Brice hefyd yn poeni am y blwch ffiwsys. Pan oedd yn gosod y boeler newydd, edrychodd y contractwr ar y blwch ffiwsys a gallodd sicrhau Mrs Brice fod popeth yn iawn gan felly dawelu ei meddwl. Fe wnaeth y gweithiwr achos hefyd gynnal gwiriad budd-daliadau i sicrhau bod Mrs Brice yn hawlio pob budd-dal yr oedd ganddi hawl iddynt a rhoddodd wybodaeth iddi am system larwm cymunedol.

Mae gan Mrs Brice yn awr gartref clyd a gaiff ei wresogi gan foeler effeithiol sy’n ei helpu i gadw ei biliau ynni yn is. Mae'n dawel ei meddwl gan wybod fod y boeler yn annhebygol o dorri gan ei gadael mewn tŷ oer heb unrhyw ddŵr poeth. Mae ganddi hefyd dawelwch meddwl fod y gwaith trydan yn ei chartref yn ddiogel ac mae'n hawlio'r holl fudd-daliadau y mae ganddi hawl iddynt.

Gwrandwch ar Mrs Brice yn dweud ei stori.

Mr & Mrs King

Mae Mr King (67) yn gyn löwr ac mae ganddo nifer o anhwylderau iechyd yn gysylltiedig â'i swydd. Mae'n simsan iawn ar ei draed a chafodd godwm ddifrifol yn mynd allan o'r bath. Ni all ymolchi heb gymorth ei wraig.

Cysylltodd Mr a Mrs King â thîm Grant Cyfleusterau i'r Anabl eu hawdurdod lleol i ofyn am help ond cawsant eu gwrthod ar y sail fod eu hincwm yn rhy uchel (roedd eu gwariant yn agos iawn i'w incwm, ond nid yw proses prawf modd Grant Cyfleusterau i'r Anabl yn ystyried gwariant).

Fe wnaethant gysylltu gyda Gofal a Thrwsio oherwydd na wyddent sut i gael yr help roeddent ei angen. Gan eu bod eisoes wedi cael adroddiad Therapydd Galwedigaethol y Grant Cyfleusterau i'r Anabl, fe wnaethom helpu i ganfod a sicrhau cyllid ar gyfer yr addasiadau angenrheidiol. Roedd Mr King yn gorfod byw lawr grisiau ac ymolchi yn y gegin. Fe wnaeth Gofal a Thrwsio sicrhau cyllid ar gyfer lifft grisiau i ddechrau ac yna grant i dynnu'r bath a gosod cawod cerdded i mewn.

Pan oeddent yn cefnogi Mr a Mrs King gyda'r addasiadau, sylwodd gweithwyr achos hefyd fod y trothwy i'w cartref yn uchel iawn. Fe wnaethant drefnu gosod hanner trothwy ac yn awr gall Mr King fynd i mewn ac allan o'i gartref yn rhwyddach. Nododd y gweithiwr achos hefyd mai dim ond un larwm mwg oedd yn gweithio yn y cartref, felly trefnwyd gosod larwm mwg arall ar y landin ar y llawr cyntaf.

Mae Mr King yn awr yn gallu mynd lan y grisiau i gysgu ac yn fwy diogel yn yr ystafell ymolchi, ac mae'n llawer llai tebygol o gael codwm oherwydd y ciwbicl cawod newydd. Mae hefyd yn gallu ymolchi ar ben ei hunan eto.

Gwrandwch ar Mr a Mrs King yn dweud eu stori::

Pauline and Brian

Pan oedd Pauline a Brian angen addasu eu hystafell ymolchi fel y gallai Pauline ymolchi'n ddiogel, wydden nhw ddim gyda phwy i gysylltu. Yn ffodus, dywedodd ffrind wrthynt am Gofal a Thrwsio ac oddi yno cafodd eu problemau eu datrys.

Gyda help a chymorth Gweithiwr Achos a Swyddog Technegol yr Asiantaeth Gofal a Thrwsio leol, daeth y cwpl o hyd i gontractwyr addas i wneud y gwaith a chafodd eu hystafell ymolchi ei thrawsnewid. Gyda chawod gyda mynediad gwastad yn lle'r hen fath, gall Pauline yn awr ymolchi'n ddiogel ac yn annibynnol.

Fe wnaeth Gofal a Thrwsio hefyd gynnal gwiriad Cartrefi Iach llawn ar eu cartref ac fel canlyniad gosodwyd canllawiau bach i helpu Pauline i fynd i fyny a lawr y grisiau o ddrysau blaen a chefn eu cartref. Nododd y gweithiwr achos hefyd nad oedd y cwpl yn hawlio Lwfans Gweini a'u helpu i wneud cais llwyddiannus sy'n golygu eu bod yn awr £8,500 y flwyddyn yn well eu byd.

Gwrandwch ar Pauline yn siarad am sut y gwnaeth Gofal a Thrwsio helpu pan oeddent angen addasu eu hystafell ymolchi.

Mrs Davies

Mae Mrs Davies yn 89 oed. Mae'n berchennog ei chartref ei hun, ac wedi byw yno ar hyd ei bywyd. Mae'n llesg iawn, a'i gallu i symud yn wael oherwydd arthritis. Mae ganddi broblemau gyda'i golwg a llosgodd ei throed ddeufis yn ôl sy'n araf iawn i iachau. Mae Mrs Davies yn llesg ac yn fechan sy'n gwaethygu unrhyw broblemau neu anafiadau ac mae ei chorff yn wan iawn. Er hynny, mae'n amharod i ofyn am help.

Cafodd Mrs Davies ei hatgyfeirio at Gofal a Thrwsio gan Therapydd Galwedigaethol o Dîm Adnoddau Cymunedol y Bwrdd Iechyd Lleol dan y Rhaglen Ataliaeth Gritigol.

Cafodd y gwaith ar y Rhaglen Addasiadau Brys ei wneud yn gyflym (h.y. yr un diwrnod â'r atgyfeiriad) - gosod canllaw bach a thrwsio bwrdd bwyta. Fe wnaeth gweithiwr achos asesu'r cartref a rhoddwyd larwm mwg a synhwyrydd carbon monocsid. Gwrthodwyd cymorth bellach ar gyfer cymhorthion ac addasiadau a gwelliannau. Fodd bynnag, ar ymweliad diweddar canfuwyd fod y cleient mewn anhawster ar ôl cael ei chloi allan. Bu'r cleient allan drwy'r nos, roedd yn dioddef o hypothermia ac mewn gofid. Aeth Gweithiwr Achos gyda hi i'r ysbyty a chytunodd ar ôl trafodaethau dilynol i gael help i osod Lifeline, mân addasiadau a NYTH ar gyfer gwelliannau gwresogi.

Mae darparu gwasanaeth sensitif, gofalus ond dygn wedi golygu y cafodd yr amharodrwydd i sicrhau cymorth ataliol ei oresgyn. Gallai'r Rhaglen Addasiadau brys yn gyflym iawn fynd i'r afael â phrif achosion o gonsyrn ond roedd y gwasanaeth gwaith achos yn rhoi 'gwerth ychwanegol' a chanlyniad mwy cynaliadwy.

Gall gwasanaeth y Rhaglen Addasiadau Brys weithio mewn ffordd sydd wedi'i thargedu'n effeithiol iawn. Mae  gennym enw da am gefnogi rhyddhau diogel o'r ysbyty a chefnogaeth barhaus yn y cartref.

Mae Mrs Davies yn dal yn fregus ond mae'n parhau'n gleient i Gofal a Thrwsio a bellach wedi dysgu ymddiried ynom a gofyn am help. Mae ei chartref yn awr yn fwy addas ar gyfer ei hannibyniaeth ac yn gynhesach a mwy diogel. Mae ei theulu a gofalwyr anffurfiol yn llawer mwy hyderus. Mae atal yr angen iddi fynd i ysbyty yn gostwng galw mewn GIG sydd dan bwysau cynyddol, ac yn arbed arian.

Ymdopi'n Well

Mae Mrs Bickle yn 85 oed, wedi ymddeol ac yn byw gyda'i mab sy'n berchen yr eiddo. Cafodd ei chyfeirio at Gofal a Thrwsio gan swyddog cydlynu clinig llygaid ar gyfer yr RNIB.

Ymwelodd Gweithiwr Achos Ymdopi'n Well gyda Mrs Bickle i anfon gwiriad cartrefi iach a dynododd nifer o broblemau.

Gwrandwch ar stori Mrs Bickle i ganfod sut y cafodd help gan y gwaasanaeth Ymdopi'n Well a'r gwahaniaeth a wnaeth i'w hansawdd bywyd.

Mr Morris

Cysylltodd Mr M gyda Gofal a Thrwsio i ofyn am help gyda'r lleithder yn ei dŷ yn arbennig yn y toiled lawr grisiau, ystafell ganol ar y llawr isaf a hefyd yn y gegin. Mae Mr M yn byw yn y tŷ gyda'i 3 plentyn ieuengaf. Dangosodd yr ymweliad cartref hefyd broblemau gydag oerfel a risgiau diogelwch yn ymwneud â chyfarpar gwael.

Fe wnaethom gael gwared â'r lleithder, gyda chefnogaeth cyllid elusennol a godwyd gan Weithiwr Achos. Defnyddiwyd NYTH i wella'r gwres canolog - darparwyd boeler a 12 rheiddiadur newydd. Codwyd cyllid ychwanegol ar gyfer ffwrn newydd, a pheiriant golchi newydd gan Swalec. Codwyd cyfanswm o £6,000.

Mae Mr M yn awr yn byw mewn cartref cynhesach ac nid yw'r lleithder yn effeithio ar ei anadlu erbyn hyn. Nid yw bellach mewn perygl o hen gyfarpar a gall goginio bwyd twym a golchi dillad y teulu. Mae ei filiau gwresogi yn is ac nid yw'n gorfod defnyddio'r olchfa.

laciwyd pwysau afiechyd, tai gwael, dibyniaeth ar ofalwyr anffurfiol a thlodi posibl. Mae amgylchiadau ei deulu wedi gwella a phryder teuluol wedi gostwng. Ataliwyd mwy o alw a chost ar wasanaethau cyhoeddus megis y GIG.